مصر بتعمل عظمة.. 5 إنجازات مصرية حصلت في 2021 اعرفهم دلوقتي

في وسط المشاكل اللي بـ تحصل في العالم.. هـ تلاقي مصر بتعمل عظمة في مجالات مختلفة.. وده رغم انتشار كورونا والأزمات الاقتصادية اللي خلقتها الجائحة.

السنة اللي فاتت 2020، مصر قدرت تنجز كتير من المشروعات، اللي خصلت أول 2021 واحتفلنا بها.

في أول 5 شهور من السنة، العالم كله بـ يتكلم عن مصر، بسبب الإنجازات اللي قدرنا نعملها في الوقت القصير والصعب ده.

يللا بينا نعرف أهم 5 إنجازات مصرية السنة دي لحد دلوقتي:

1- كأس العالم لـ كرة اليد 2021 في مصر أرض الحضارة

من أول وأهم الإنجازات اللي حصلت مع بداية سنة 2021 في مصر، كان استضافة بطولة "كأس العالم لكرة اليد" من يوم 13 لـ 31 يناير 2021.

رغم التخوّفات من كورونا، إلا إن البطولة شارك فيها 32 منتخب، ولعبوا على أرض مصر 20 يوم، من غير أي مشكلة إدارية أو صحية أو تنظيمية.

البطولة دي كانت رسالة من مصر لـ العالم، إننا على قدر المسؤولية، حتى في أصعب الظروف.

منتخبنا المصري عمل آداء مشرف في البطولة دي كمان، وكان بـ يواجه لآخر لحظة، لكن الحظ لعب دوره، وفي الآخر بقينا في المركز السابع على العالم.

وفاز بـ المركز الأول في البطولة دي، منتخب الدنمارك، وبعده: (السويد، إسبانيا، فرنسا، المجر، النرويج ومصر).

2- موكب المومياوات الملكية وافتتاح ميدان التحرير بشكله الجديد

إبهار العالم ما وقفش عند مشهد بطولة اليد.. بعد أقل من 3 شهور، كان فيه مشهد تاريخي قمة في العظمة، حدث كل الناس كانت بـ تستناه، أو بصراحة هما حدثين مع بعض.

بعد التطوير اللي حصل في ميدان التحرير، كل الناس كانت مستنية تشوفه في شكله الجديد، يوم موكب المومياوات الملكية، اللي كان بـ يتحضر له من أول السنة.

يوم 3 أبريل 2021، العالم كله كان بـ يتفرج على الحدث ده، اللي اتنقل على الهواء في حوالي 200 قناة تلفزيونية عالمية، غير البث المباشر أونلاين.

اتقال على الموكب ده، "الموكب الذهبي" علشان العربيات اللي اتعملت على الطراز الفرعوني، اللي نقلت 22 مومياء لملوك وملكات مصر الفرعونية، كانت ملونة بـ نقوشات ذهبية...

غير الإضاءة اللي كانت بالأبيض والأزرق والذهبي، الألوان اللي كانوا بـ يستخدموها أجدادنا زمان.

3- افتتاح المتحف القومي للحضارة المصرية بالفسطاط

في نفس يوم نقل المومياوات الملكية من المتحف المصري، بـ ميدان التحرير، لـ متحف الحضارة في مصر القديمة، كان الرئيس عبد الفتاح السيسي مع رئيس الحكومة ووزير الآثار، بـ يفتتحوا متحف الحضارة المصرية.

المتحف القومي للحضارة المصرية، افتتح سنة 2017، لكنه ما استقبلش زوار لإن كان ناقصه شوية تعديلات، غير التطويرات اللي كانت في بحيرة عين الصيرة اللي لسة خلصانة آخر 2020.

لكن السنة دي 2021، افتتحه الرئيس من جديد، واستقبل فيه المومياوات الملكية، ومن ساعتها بقى متاح للزيارة من 9 الصبح كل يوم.

4- اكتشاف "المدينة المفقودة" بالأقصر

بعد كل الإبهارات اللي أبهرنا بها العالم، بـ حضارتنا وورثنا من أجدادنا اللي دايمًا بـ نفتخر به، اكتشفت البعثة المصرية للآثار، اللي كان رئيسها دكتور زاهي حواس، في شهر أبريل برضه، مدينة "صعود آتون".

المدينة دي، تعتبر واحدة من المدن الفرعونية القديمة، واللي بـ ترجع لعهد الملك أمنحتب الثالث.

وكانت من المدن المفقودة، والمهمة في نفس الوقت لأن فيها آثار ترجع لـ قبل توت عنخ آمون يعني من 3000 سنة.

5- ممشى أهل مصر.. كل المصريين في انتظاره

من فترة كبيرة، تقريبًا في آخر 2019، بدأت عمليات التطوير في كورنيش النيل بطوله، من أول كوبري تحيا مصر، لحد كوبري القصر العيني.

وفي أقل من سنتين، شوفنا كلنا شكل الكورنيش الجديد، باسمه الجديد "ممشى أهل مصر"، حاجة تليق بـ مصر وشعبها والـ 7000 سنة حضارة.

الممشى، يضم مطاعم ومسارح وكافيهات نيلية عائمة، غير أماكن الرياضات المائية، زي التجديف، والمراكب الشراعية.

مافيش وقت محدد لـ يوم افتتاح ممشى أهل مصر للزوار، لكن الحكومة قالت إن ده هـ يتم قريبًا، والمصريين في الانتظار.